Launakönnun SSF er með allra bestu könnunum sem gerðar eru á vinnumarkaði.  Í síðustu könnun frá 2021 var svarhlutfallið 79,4% . Það gerist vart betra og niðurstöður verða varla traustari.

Starfsfólk fjármálafyrirtækja fær oft framan í sig þá fullyrðingu frá stjórnendum að ekkert sé að marka niðurstöður könnunar SSF. Það er varla hægt að komast fjær sannleikanum. Könnunin er algerlega unnin af Gallup og kemur SSF hvergi nærri framkvæmd hennar og úrvinnslu. Með því að segja að ekkert sé að marka könnun með næstum 80% svarhlutfalli eru fyrirtækin í raun og veru að segja að Gallup sé ekki hæft til að vinna svona könnun.

SSF og Gallup munu standa að nýrri könnun í nóvember 2023. Sú gamla er orðin tveggja ára og þarf að bæta a.m.k. 90 þús. kr. við niðurstöður mánaðarlauna í þeirri könnun til þess að fá stöðuna í dag.

Margir hafa notað launareiknivél á heimasíðu SSF til þess að glöggva sig á sinni stöðu. Launareiknivélin er ekki nógu góð að því leyti að eftir því sem fleiri skilyrði eru sett inn í hana, því meira minnkar úrtak þeirra svara sem hægt er að nota, og leit skilar ekki niðurstöðu. Á næstu vikum mun verða skoðað hvort breyta megi launareiknivélinni til þess að hún nýtist betur eftir að niðurstöður nýju launakönnunarinnar liggja fyrir.

Það má hins vegar alltaf fá gagnlegar niðurstöður með því að rýna í niðurstöðurnar sjálfar. Í því sambandi má t.d. benda á töflur á bls. 45-47 og bls. 173-181 í könnuninni frá 2021.

Niðurstöður í heild finnur þú með því að smella á neðangreinda flýtileið:

2021 Launakönnun