Fréttir

  Í 4. grein kjarasamningi SSF og SA frá 16. maí 2011 segir:
Samningsforsendur: „Verði gerðar breytingar á samningsákvæðum eða samningstíma á grundvelli forsenduákvæðis í kjarasamningum SA og aðildarsamtaka ASÍ, dags. 5. maí 2011, skal það sama gilda um þennan samning."
Nú er ljóst að engin breyting verður á samningi ASÍ og SA og er því kjarasamningur SSF og SA áfram í fullu gildi. Næsta launahækkun, 3,5%, verður 1. febrúar 2012.

Verið er að vinna úr umsóknum í menntunarsjóð SSF. Styrkir verða greiddir út 31. janúar nk.

Eitt af því sem kemur upp í hugann þegar áramótaheit eru nefnd á nafn er hreyfing. Margir setja sér um áramót markmið um að hreyfa sig meira á næsta ári. Samkvæmt viðmiðum um lýðheilsu er talið mjög æskilegt að hreyfa sig rösklega samfellt í minnst hálftíma á dag amk. 3 - 5 daga á viku. Í Niðurstöðum könnunar á líðan, heilsu og vinnuaðstæðum sem framkvæmd var meðal félagsmanna SSF vor 2011 má sjá að 47% svarenda er að uppfylla þessi markmið. Það merkir jafnframt að rúmlega helmingur svarenda hreyfir sig minna en sem nemur því lágmarki sem þarf til að halda góðri heilsu og þar af eru 27% sem hreyfa sig sjaldnar en einu sinni í viku. Nú er ekki úr vegi að biðja félagsmenn að athuga sinn gang og skoða hversu mikið þeir eru að hreyfa sig. Sjá nánar niðurstöður könnunar hér  

Ágætu félagsmenn SSF
Nú er runnið upp nýtt ár með nýjum möguleikum og nýjum fyrirheitum.
Um leið og við viljum þakka samstarfið á liðnu ári viljum við minna ykkur á skilafrest umsókna í menntunarsjóð SSF sem er 15. janúar.
Miðað er við að ljúka útgreiðslu styrkja fyrir lok janúar.
Með bjartri nýárskveðju
Starfsmenn SSF

Þeir eru hugmyndaríkir í Fjármálaráðuneytinu þegar að kemur að skattlagningu og nafngiftum. Nú hefur ríkisstjórn Jóhönnu og Steingríms ákveðið að skella á 10,5% sérstökum launaskatti á starfsmenn fjármálafyrirtækja, og í takt við húmor og skáldskapargáfu ráðherrans kalla þeir launaskattinn „fjársýsluskatt".
Að sjálfsögðu munu fjármálafyrirtækin bregðast við þessari auknu skattlagningu, enda launaskattur á þau þar með kominn í rúmlega 19%, eða um 9% hærri skattur en í Danmörku...

Allir stóru bankarnir í Danmörku hafa nú tilkynnt um verulega fækkun starfsmanna eftir vonbrigði með útkomu bankanna á fyrstu þremur ársfjórðungum 2011. Nordea, Jyske og Sydbank voru fyrstir til, en nú hefur Peter Staarup forstjóri Danske bank tilkynnt um 10% fækkun starfsmanna eða um 2000 manns á næstu þremur árum. Hann kennir um miklum óróa á fjármálamörkuðum, nýjum reglugerðum, m.a. Basel III, og háum kostnaði við endurfjármögnun. Af þessum sökum verði að skera enn meira niður í rekstrarkostnaði. Allur rekstrarkostnaður verði skorinn niður, ekki bara launakostnaður. Peter Staarup verður 60 ára á þessu ári og hefur óskað eftir því að láta af störfum og fara á eftirlaun. Leitað er að nýjum forstjóra fyrir Danske bank.

Í umræðum um skattlagningu á fjármálafyrirtæki hafa þrír valkostir helst verið nefndir í umræðunni á Norðurlöndum og í Evrópu
1. Skattur á launakostnað fjármálafyrirtækja. Dæmin sýna að þessi skattur er hvati til að fækka starfsmönnum og halda niðri launaþróun á meðan bónusar og hlutabréfaívilnanir til stjórnenda lenda oftast utan við þann skattstofn.  
2. Skattur á heildarveltu fjármálafyrirtækis. Slær á tilhneigingu til að blása út efnahagsreikning með útlána eða skuldsetningarþenslu.
3. Skattur á fjármálagerninga. Hefur stöðugleikaáhrif og hefur lítil áhrif á þætti sem tengjast raunverulegu hagkerfi, en hinsvegar þurfa spákaupmenn að greiða þennan skatt við hver viðskipti.

Samningur um vottun fjármálaráðgjafa var undirritaður í dag. Verkefnið er samstarfssamningur efnahags- og viðskiptaráðuneytis, Háskólans á Bifröst, viðskiptafræðideildar Háskóla Íslands, Háskólans í Reykjavík, Samtaka starfsmanna fjármálafyrirtækja og Samtaka fjármálafyrirtækja (SFF), sem jafnframt hafa leitt verkefnið.

Athygli vekur að í fréttum frá norðurlöndum af góðum árangri í rekstri Nordea bankans, eins stærsta banka norðurlanda, þá áformar bankinn að segja upp allt að 2000 starfsmönnum.
Þessi frétt kom í kjölfar þess að bankinn skilaði 21% betri árangri en á sama tíma í fyrra. Stéttarfélög starfsmanna og NFU samtök norrænna starfsmanna fjármálafyrirtækja hafa lýst því yfir að þessar ætluðu uppsagnir í mótsögn við aðferðir sem notaðar eru í vel reknum fyrirtækjum og að þær séu trúnaðarbrestur í fyrirtæki sem hingað til hefur stært sig af því að eiga í góðu samstarfi við starfsmenn og að leyfa þeim að njóta góðs af góðum rekstrarárangri. Jafnframt segja samtökin að svo virðist sem eini tilgangur þessara uppsagna sé að hækka arðgreiðslur til hluthafa.  
 

Skráning á golfmót SSF- opið fyrir skráningu til miðvikudags 24. ágúst 2011 kl. 13:00
Golfmót SSF verður haldið á golfvelli GS, Hólmsvelli í Leiru 27. ágúst nk..
Mæting kl 8.00. Ræst verður út á öllum teigum kl. 8:30 Reiknað er með að mótinu ljúki um kl 13.00 - 13.30 Veitingar í mótslok eru í golfskálanum milli 13:30 og 16.00.
Boðið upp á:
Grillað lamb + meðlæti og 1 drykkur

Leikið er í eftirfarandi flokkum:
- Einstaklingskeppni karla og kvenna, Höggleikur + punktakeppni með forgjöf. Gjafabréf frá Golfbúðinni Hafnarfirði.
20.000
12.500
7.500

- Sveitakeppni með og án forgjafar (punktar). Þrír í sveit og tveir bestu telja. Skor úr einstaklingskeppni gildir.
- Nýliðakeppni félagsmanna á 1. og 2. ári í golfi, 18 holur. verðlaun fyrir besta skor (punktar með forgjöf).
- Makar og gestir:, verðlaun fyrir besta skor (punktar með forgjöf).

Nándarverðlaun eru á öllum par 3 holum á gríni.
Verðlaun fyrir þann sem er næstur holu 2 höggum á gríni á 9. holu.
100 fyrstu sem skrá sig og greiða þátttökugjald komast að.
Þátttökugjald er kr. 2.500 og greiðist inn á reikning 113-26-001544 kt: 550269-7679. Vinsamlega tiltakið nafn og kennitölu greiðanda. Sýna verður kvittun á mótsstað.
Skráning er eingöngu í beinni innskráningu http://www.landsbanki.is/skraning/Golfmot-SSF-2011 eigi síðar en kl. 13.00 miðvikudaginn 24 . ágúst.